Nyong deng nona, beta mau bilang
Kamong harus banyak-banyak bersyukur
masih pung keluarga yang lengkap
yang pung papa deng mama masih ada
bersyukur,
kamong minta apa saja
dong masih bisa kasih
meskipun yang dong dapatkan itu
deng cara seng gampang, setengah mati lawang
kadang dong harus pi bapinjam di orang
kas jatuh dong pung rasa malu
kadang jua uang yang harus dong simpang
par bali dong pung baju sabiji tu
dong harus kas kaluar akang par bali kamong pung kebutuhan
asalkan dong bisa lia kamong bahagia sama deng ana-ana yang laeng
kamong harus banyak-banya bersyukur
masih bisa dengar dong pung suara setiap hari
masih bisa hirup dong pung aroma badang setiap saat
deng masih jadi bahu terbaik sesuai deng yang kamong inginkan
lalu, dong masih kas bangun kamong par pigi skolah
masih suruh deng batamang kamong balajar
deng salalu kas kuat kamong par raih cita-cita yang kamong inginkan
dong masih batamang kamong, kapanpun kamong mau
masih kasi ingat kamong makang
dong masih jadi tamang carita terbaik par kamong
dong masih ciom-ciom kamong di setiap waktu
deng satu lai
dong masih polo polo kamong
supaya kamong seng rasa sunyi lewati hari
sesekali
kamong tatap dong muka
setelah dong abis karja
atau tatap dong mata
ketika dong ada tatidor sono
di situ ada rasa lalah
yang seng pernah dong carita
sekalipun kamong malawang dong
dong masih sempat sebut kamong pung nama dalam doa
Deng kalau papa mama su tua
su banya permintaan
su banya rewel
su mulai seng kalaseng deng hidup
Jang kamong bentak-bentak dong
jang marah-marah dong
Kamong seng inga waktu kamong masih kacil ka
seng inga waktu kamong dapa buju ketika kamong ada manangis ka
Inga jang patahkan dong pung hati
karena banyak keinginan kamong yang blom bisa dong penuhi
inga ee
Rawat dong semacam dong rawat kamong
dari kacil sampe basar bagini
Tulisan Terkait
Berita Lainnya
sebenarnya dong itu paleng lalah
deng kerasnya dunia yang dong hadapi
deng kamong pung tingkat laku setiap hari
yang kadang bikin dong sampe jatuh saki
kamong seng tau to ada banyak luka di dong pung hati
kadang jua dong tahang air mata yang jatoh setiap hari
dong bungkus akang rapat-rapat dalam sunyi
beta mau bilang
jang kas kecewa dong
karna kalau dong su seng ada lai
suara, deng pelukan itu
kamong mau cari akang di mana lai?
mau dapa akang di sapa lai?
jadi kalau dong masih ada
jang bikin dong kecewa
jang bikin dong manangis
deng sagala kamong pung kenalakan tu
yang bikin dong ada dalam beban yang seng pernah abis-abis
kamong seng tau to arti dari kata
nyong deng nona makan jua papa deng mama su makang
itu sebenarnya dong ada manahang lapar
asalkan dong seng lia kamong kelaparan
jadi kalau dong masih ada
jang bikin labe
jang kamong manyasal
ketika dong pung tampa tidor su kosong
dong pung kursi makang su paleng sunyi
Lalu, pigi ka dapor mama su seng ada lai
Pigi ka ruang tv papa su jauh pigi
tinggal rindu di dasar hati
di situ baru kamong menyadari
sakitnya kehilangan
deng hilangnya kasih sayang
beta mau bilang
jang bikin labe
jaga dong pung perasaan bae-bae
tahoku, 25 oktober 2025