Baku Pica Kalapa
Baru tiga hari musim baku pica kalapa. Samping rumah paleng rame paskali deng ana-ana. Memang hari pertama seng serame, begitu jua deng hari kedua. Samua ana-ana paleng sanang. Karena deng baku pica kelapa jua dong bisa dapa uang tambahan par jajan di sekolah. Hal itu yang Hendra deng Gobe jua rasa.
Hendra deng Gobe itu dong dua batamang. Batamang bae dari kacil lai. Kamana-mana saja dong dua salalu sama-sama. Baku bawa tarus.
Hari itu Gobe deng Hendra dong dua pi di kabong. Sampe di kabong dong dua punggul kalapa paleng banya paskali. Tapi seng samua dong ambel, hanya dua buah saja yang dong ambel, yang laeng dong simpan di rumah kabong. Saat itu Gobe kaget deng pohon giawas akang pung buah paleng banya paskali, sampe su kuning-kuning.
“Weh…giawas paleng banya ee!” Gobe bilang bagitu iko deng suara basar.
“Iyo ee, katong nae ayo!” Hendra ajak Gobe par nae.
Tapi Hendra yang ajak Gobe ni, dia seng tau nae. Dia tunggu sa di bawah pohon. Akibatnya Gobe yang nae. Pohon giawas akang pung jaga seng talalu basar. Gobe nae dia seng peduli deng giawas yang di dekat dia, katanya akang talalu kacil, dia cuma fokus deng buah yang paleng basar paskali. Dia maraya iko jaga, sampe jaga bongko. Jaga yang bongko akang jatuh pas di muka Hendra. Hendra seng langsung peti akang iko deng dia tatawa basar-basar. Gobe peleng emosi. Gobe ni biar bagitu dia jua termasuk orang paleng sabar. Gobe jua seng suka baku mawalang, dia peti saja yang kacil-kacil. Dia isi akang di dia pung baju. Baru dia turung dari pohong.
Hendra masih tatawa, tapi Gobe bilang par Hendra “Biar se pung basar lai, tapi itu kan cuma satu, beta pung biar akang kacil-kacil tapi akang paleng banya”
Dong dua pulang bawa kalapa deng giawas. Sampe rumah dong dua kupas kalapa, dong kupas akang pung kuli luar saja par mau baku pica. Kalapa su abis kupas. Gobe tahang kalapa satu buah, Hendra jua sama. Dong dua menuju tamang-tamang yang ada baku pica. Di sana dong dua cari lawan.
Saat itu Gobe dapa lawan. Gobe sunteng deng lawan, dia kalah sunteng, dia guling kalapa kamuka. Akibatnya Gobe kalah baku pica, lawan ambel dia pung kalapa. Gobe paleng sial. Berbeda deng Hendra, dia dapa lawan, dia sunteng deng lawan, dia menang baku pica. Hendra menang baku pica paleng banya. Kalapa yang Hendra sudah menang akang, dia kasi saparu par Gobe. Kalapa yang pica separunya dong bawa pulang ka rumah par dong mama biking sayor, yang saparunya dong jual. Dari situ dong paleng sering dapa uang, dapa jua rasa bahagia.
Catatan Kaki
Baku pica kelapa: Adu kelapa
Paleng: Paling
Paskali: Sangat
Ana-ana: Anak-anak
Rame: Ramai
Deng: Dengan
Dong: Mereka
Tulisan Terkait
Berita Lainnya
Par: Untuk
Batamang: Berteman
Bae: Baik
Pi: Pigi
Kabong: Kebun
Giawas: Jambu biji
Su: Sudah
Akang: Mengarah pada rupa/wujud
Nae: Naik
Seng: Tidak
Maraya: Merayap
Bongko: Bengkok ke bawah
Malawang: Membantah
Turung: Turun
Kuli: Kulit
Banya: Banyak
Sunteng: Sunting dengan jari
Sayor: Sayur
Firman Wally pria kelahiran Tahoku 03 April 1995. Lulusan Universitas Pattimura Ambon jurusan Sastra dan Bahasa Indonesia. Namanya sudah tergabung kurang lebih 60 antologi bersama. Antologi tunggalnya "Lelaki Leihitu" "Kutemukan Penyesalan di Setiap Kehilangan" dan "Menghibur Luka". Puisi-puisinya pernah dimuat di berbagai redaksi baik online maupun cetak: APAJAKE, SEMESTA SENI, ELIPSIS, Poros Timur dll. Kini aktifitasnya sebagai pengajar. Nama pena: firmanwally02